"Технопарк"да ёнғин. Икки киши ўлди, беш киши касалхонада

1 май куни Тошкентдаги “Технопарк” ҳудудида келиб чиққан ёнғинда икки киши ҳалок бўлган, беш киши тан жароҳати билан касалхонага ётқизилган.

Расмий маълумотларга кўра, ёнғин ишлаб чиқариш цехида технологик жараённинг бузилиши натижасида содир бўлган.

Ўзбекистон Фавқулодда вазиятлар вазирлиги маълумотига кўра, Тошкент шаҳрининг Яккасарой тумани, Қушбеги кўчасида жойлашган “Технопарк” ҳудудидаги Синтепон ишлаб чиқариш цехида 1 май куни эрталаб соат 7ларда ёнғин содир бўлган.

"Ёнғин бартараф этилгандан сўнг, ёнғин жойини ўрганиш давомида икки нафар фуқаронинг жасадлари аниқланган. Шунингдек, 5 нафар фуқаро тан жароҳати билан шифохонага юборилган", дея ёзди Фавқулодда вазиятлар вазирлиги.

Вазирлик “ёнғин ишлаб чиқаришда технологик жараённи бузилиши натижасида юзага келганлиги тахмин қилинаётгани”ни билдирди.

Ҳодиса бўйича ҳуқуқ-тартибот идоралари тергов олди суриштируви бошлагани маълум қилинди.

“Технопарк”даги 1 майдаги ёнғинга техник сабаб келтирилаётган бўлсада, ҳодисанинг айнан хусусийлаштириш мавзуси кўтарилгач содир бўлгани тармоқ фойдаланувчилари орасида саволларга сабаб бўлди.

“Технопаркдаги ёнғин фақат саноат инциденти эмас — бу давлат мулкини хусусийлаштириш жараёнининг қанчалик нозик ва хатарли бўлишига ёрқин мисолдир. Агар ҳодиса чинакам тасодиф бўлса ҳам, у бизга саноат хавфсизлиги, шаффоф хусусийлаштириш ва жамоатчилик назорати борасида жуда муҳим сабоқ бўлиши шарт. Аммо агар бу ёнғин ортида манфаатдор гуруҳларнинг изи бўлса — унда бу фақат бошланиши бўлиши мумкин. Стратегик объект бўлган "Технопарк" атрофидаги иқтисодий ва сиёсий рақобатни инкор этиб бўлмайди. Бу ёнғин манфаатлар учун қасддан қилиндими ёки рақобатчилар ишими? Шаффоф тергов ўтказилиб, натижалар эълон қилиниши шарт”, дея ёзди Нодир исмли тармоқ фойдаланувчиси.

Мавзуга алоқадор

Хусусийлаштириш: Мирзиёев кўз-кўз қилаётган потенциал қачондир юзага чиқадими?

Экспертлар одатда, технологик жараён бузилишини ишлаб чиқариш объектларида техника хавфсизлиги таъминланмаганига боғлашади. Аммо бу ҳолатнинг тартибсизлиги, яширин равишда манфаатдор шахслар фойдасига ишлаши мумкинлиги тахмин қилинади.

Қасддан ёки эҳтиётсизлик туфайли келиб чиққан ёнғин натижасида объектни арзонлаштириш ва хусусийлаштириш жараёнининг кечикиши манфаатлар доирасига киритилади.

Тошкент текстиль комбинати ҳудудида қад ростлаган Технопарк қурилиши 2014 йил ташкил қилинган. Орадан икки йил ўтиб, Тошкент шаҳри маъмурияти "Технопарк"ни ривожлантириш учун 90 миллиард сўмдан зиёдроқ маблағ киритилишини маълум қилган.

“Технопарк” ҳудудида текстиль ва ёғочни қайта ишлашдан тортиб то автомобилсозлик ва кимё саноатигача бўлган турли хил ишлар амалга оширилади.

Мавзуга алоқадор

Тошкентдаги Технопаркда портлашлар ва ёнғин содир бўлди

Шу пайтгача “Технопарк”да камида учта йирик ёнғин содир бўлган. Дастлаб объект ишга тушганидан икки йил ўтиб, 2016 йилнинг 9 июнь куни “Технопарк” ҳудудида кучли ёнғин ва бир нечта портлашлар содир бўлган. Расмийлар ўша пайтда воқеа тафсилотларини очиқламаган.

2022 йилнинг 1 сентябрь куни “Технопарк”нинг тахминан 1000 квадрат метр майдонида ёнғин юз берган. Расмийлар ҳодиса оқибатида қурбонлар бўлмаганини хабар қилган.

Фавқулодда вазиятлар вазирлигига кўра, бу сафарги ёнғинда “Технопарк”нинг Синтепон ишлаб чиқариш цехининг тахминан 700 квадрат метр майдонида бинонинг томи, шифти ва маҳсулотлар ёниб зарарланган.

Яккасарой туманидаги “Технопарк”да ёнғин чиққанидан 10 кун аввал пойтахтнинг Яшнаобод туманидаги “Технопарк” МЧЖ хусусийлаштирилиши маълум бўлди.

“Технопарк” МЧЖ Жаҳонгир Ортиқхўжаев Тошкент шаҳар ҳокимлигига келгач, таъсис қилинган.

“Технопарк” МЧЖ раҳбари Сарвар Аҳадов муқаддам «Dream Production» компаниясини бошқарган. Бу корхона ҳудудида Artel кондиционерлари ишлаб чиқарилади. «Dream Production»нинг ягона таъсисчиси эса Жаҳонгир Ортиқхўжаевдир.

Тошкент шаҳар ҳокимлиги таъсисчиси, амалда эса, Ортиқхўжаевнинг хусусий ширкатлари ўринлашган “Технопарк” кўплаб соҳаларда монополликни сақлаб келади.

Жумладан, тўрт йил аввал Монополияга қарши курашиш қўмитаси Тошкентдаги кўп қаватли уйлардаги эскирган лифтларни янгисига алмаштириш ва таъмирлаш, янги қурилаётган уйларга лифт ўрнатиш биргина “Технопарк” МЧЖга топширилишига эътироз билдирган эди.

Пойтахт ҳокимлиги 100 фоиз эгаси ҳисобланган “Технопарк” МЧЖ президент Мирзиёевнинг 21 апрелдаги қарорига кўра, хусусийлаштириш рўйхатига киритилган.

Президент қарорида “Технопарк” МЧЖ йирик корхона сифатида қайд этилган бўлиб, унинг 100 фоизлик акциялар пакети 2026 йилнинг биринчи чорагида сотувга қўйилиши лозим эди.

​Ҳозирда "Технопарк"нинг аниқ бозор баҳоси ёки хусусийлаштиришга қўйилган нархи ҳақида расмий маълумотлар мавжуд эмас. Бу маълумотлар, одатда, хусусийлаштириш жараёнидаги тендер ёки аукцион натижалари орқали аниқланади.​